Una Austriana au País daus trobadors !

Sabe pas tròp coma se faguèt màs un mandin d’ivern ai reçaugut sus ma boitia de corric un mot dau sénher Robert Linas que resta en Miegjorn Pireneus dau costat de Montalban.

Son associacion « Austria e País d’Òc », se demandava simplament se quò interessariá quauqu’un de reçaubre una etudianta Austriana, de l’Universitat de letras de Viena, mentre 3 o 4 setmanas. Las condiccions ? Paguna se que non de s’ocupar un pauc d’ela e de li far un descreubir nòstra cultura. Ela deviá en eschanja aidar a la maison e s’entestar daus goiassons. Nos sem dich, ma femna e ió que seriá una bona eschaison per tota la familha de se dreubir ad una cultura que coneissián pas gaire, viram que sem chap a l’Inglaterra e a l’Espanha.

La resulta fuguèt enquera mielh que çò qu’esperavam. Aprep quauques jorn d’observacion, Sandra (qu’es son pitit nom) faguèt leu partit de la familha. E pauc a pauc a veire nòstras culturas en regard de la soa permetét a mos dos dròlles de s’interessar un pauc mai a la lor tot en portar un espiar nuòu sus la cultura de nòstra convidada. Pense que quela joina femna serà aura una bona ambassadriça per Occitània. Es quitament devenguda « fan » de Moussu T e lei Jovent que veguerèn ensemble en concert a Sent Joan de Còsla. A quitament descreubert a nòstre contact que podem minjar sens aver fam ! E n’autres anirem benleu un jorn nos passejar dins lo ranvers de Salzborg que la joenòta nos en a fach bona reclama.

Seriá ben content, ió, que mos mainatges pueschan un jorn anar entau descreubir una autra lenga ed una autra cultura tant aisidament coma lo perpausa l’associacion dau sénher Linas. Laidonc pòde màs conselhar, au monde qu’an de plàça a l’ostau e un pauc de temps, de participar a queu eschanja agradiu e avivareu.

Per las entresenhas : Autriche et Pays d’Oc, 1595 Route de Bellegarde, 82230 Léojac
Tél. : 05 63 64 57 27 – corric : journalrobert@wanadoo.fr – https://www.o-p-i.fr/7alire/