Dissabte , a La Vila Dieu del Temple en Tarn e Garona , se faguèt un brave omenatge al Nadal Rey dins l’encastre de sa centièma annada.

Hilh / filh d’una maire gascona e d’un paire lengadocian, Nadal banhèt dins lo bilinguisme occitan tre sa naissença lo 23 de decembre de 1911 e son pas los 40 ans passats luenh de son Occitania que li faguèron dulvidar sas raiças, al contrari . «  Quand tornavi en visita, parlavi occitan a ma maire que li ai jamai, jamai parlat francés, per ièu aquò seriá estat li faire escòrna que li pas parlar occitan. ».

Çaquelà quand prenguèt la retirada – èra professor de castelhan – e que dintrant en França ajèt l’idèia de crear l’ « Amicala dels Ancians » en 1974 a La Vila Dieu del Temple, recebèt un còp al còr «  Aquò es una plan bona idèia , çò diguèt qualqu’un ( en occitan de segur per pas esser compres del Nadal Rey ) mas es plan domatge que vengue d’un estrangièr ». La sanqueta del Nadal ne faguèt qu’un torn e respondèt ( en occitan de segur ) «  Ont es l’estrangièr ? Pr’amor es pas ièu , que parli la lenga tan plan coma vos » . Nadal dulvidara pas aquel moment ont mercés a sa lenga fuguèt pas mai un inconegut coma li agrada de lo soslinhar . Amb’aquel club dels Ainats , La Vila Dieu se faguèt lo breç d’una idèia que faguèt lo torn del mond e sens lo saber los Teopolitans ( estajants de La Vila Dieu) parèron la man a 125 millions d’Ainats aderents de la FIAPA ( Federacion internacionala de las Personas annadidas . Los Vielhs coma diriá Padena !) . Nadal Rey fuguèt justament l’inventor del concept et del mot Ainats ( ambe una majuscula): los eiritièrs qu’an la mission de far passar lor saber e de segur la lenga e la cultura sèunas que siaguen d’Occitania o del Paraguay. Nadal Rey es ara maridat ambe una Paraguaiana …que seguis los corses d’occitan qu’anima lo Nadal a La Vila Dieu ont es que sa darrièra creacion es Lo recaliu ( al nom plan simbolic coma o fuguèt « Lo luquet » a Granada sus Garona ont anava , de nuèit portar la bona paraula occitana far mens de 10 ans … ).

Nadal Rey es tanben l’inventor de Presencia vèrta, aqueste sistema de tele-assistançia que justament permet als Ainats de damorar dins lor environament cultural . Caldria una Setmana entera per resumir la vida de Nadal rey «  Occitan cap e tot, semenaire d’idèias, òme d’accion, menaire d’òmes e escrivan *» Tal es lo titol de la mòstra realizada per Tarn e Garona occitan, ( TG’OC ) associacion Frederic Cayrou » que Nadal Rey n’en foguèt l’instigator en 2007, lo co-fondator en 2008 e n’es totjorn lo plan actiu vice-president … ( Per el C.A … vòl pas dire Conselh d’Administracion mas « Cal Avançar » !!!

Alèra desiram al Nadal de contunhar d’avançar suls « Camins » ( titol de son 1° libre ) qu’a tan corregut a pé o a bicicleta perque aquel óme de cap es tanben un espòrtiu que Lenga viva, universitat occitana d’estiu de Mièjorn Pirenèus a La Guépia acuelha cada annada per la passejada onomastica . Ten – te fièr Nadal e Rendetz-vos per la protesta de Tolosa lo 31 de març 2012 !

• escritz en occitan, francès e castelhan . Sa darrièra publicacion ambe la complicitat de TG’OC es pareguda a la prima de 2011 « L’esclarida » , una causida de poèmas en occitan ambe revirada en francés per l’autor. Editions Ixcea.